Jure nas je uvik tuka. U razredu bi podmeća noge, ili uštipnija koga i mi bi se ženske bojale doć blizu Jure. Jednon riči, Jure je bija moj prvi neprijatej. Malo san ga zaobilazila onda i bok. A i druga dica bi ga zaokružila da ih ne bi nekon nesrićon udrija.
Ka bi se vraćali ča iz škole put doma, mi bi se ženske držale skupa, a muški napose. Oni su bili ka neki frajeri i tili su nan činit dišpete. Pa bi brzo trčali prid nas, sakrili se u šumicu i izvukli neke grane od palme ili možebit tamarina i udri po nama. Ka divjaci bi nan uskočili u korak, a mi onda tričimoooo. Mi bi bidne trkale ka lude, koliko nas god noge nose svaka u svoju kuću. Srce bi tilo iskočit ča vanka. A oni, još više, juriš za naman. I to bi bija pravi pravcati straj da nas Jure i ekipa ne natuču.
Sitila san se Isusa i kako je mater govorila da je On reka da triba činit dobro i oniman divjima
Onda je jedanput tribalo donit po kunu za siromašne u Africi u školu. I ja san ti dan imala dvi kune slučajno u borši. A Jure nije donija ti put. Sitila san se Isusa i kako je mater govorila da je On reka da triba činit dobro i oniman divjima, oniman koji nan i zlo čine, neprijatejiman.
U taj tren me odma uvatija bis i jid ka san se svatila da triban jubit baš toga Juru koji me mlati i bojin ga se. Ali onda opet… jesan. Jure je bija moj prvi neprijatej kojega san jubila.
Pa je tudan, priko Jure, prišlo na mene veseje iz Isusova Srca
Ono ka da drugi baš i ne vidu malo san se prišujala Juri, brzopleto mu uvalila kunu i vratila se na svoje misto u drugu klupu. Bez puno riči, bez puno nagovaranja i bez zahvaljivanja. On se malo bidan ka bija zasramija, prikrija prid drugin da san mu dala tu kovanicu i tako je ti put prošlo. Pa je tudan, priko Jure, prišlo na mene veseje iz Isusova Srca u prvon razredu velike osnovne škole di ima samo 4 učionice.
Marija Grgić – Žena vrsna
Foto: Jordan Cannella
